Овој вторник 28.3.2023, со почеток од 21 часот во Младинскиот културен центар (Џебно кино) ќе се одигра претставата „Да го поздравиш и да ми го бациш“, во режија на Билјана Радиноска.
Да го поздравиш и да ми го бациш е документарна претстава, авторско дело на четворица актери и еден режисер. Ја раскажува приказната за растењето, за соништата за себеостварувањето и за соочувањето со општествените механизми на функционирање. Темите што се отвораат во претставата (уметноста во себе, надежите, стравовите, борбите за остварување на креативниот потенцијал…) се одраз на личните искуства на актерите и зборуваат за борбата за индивидуална слобода.
„Каков треба да биде театарот денес? Кое е неговото место во општеството? Кое е местото на младинците во општеството во кое живееме? Претставата зборува и за: емотивната слика на индивидуалниот внатрешен конфликт помеѓу интутитивното и рационалното, слика за вакуум просторот помеѓу „каков сакаме да биде животот“ и „каков животот навистина е“ итн. Севкупно, актерите на сцена поставуваат прашања и отворат дилеми барајќи начин да ги одговорат.“
Играат: Бојан Кирковски, Наташа Петровиќ, Ненад Митевски, Симона Спировска
Претставата не е наменета за лица под 16 години. Билетите се достапни на билетарница во МКЦ и онлајн преку bileti.mkc.mk
