Кошмарните моменти што ги доживеаја патниците од кобниот воз во Грција оживеаја во очите на полицијата и спасувачите кои први пристигнаа на местото на трагичната железничка несреќа. Таму видоа апокалиптични слики.
Луѓе распарчени, млади расфрлени во околните ниви и мртви, многу мртви. Повредените се обидувале да најдат начин да избегаат.
На местото први пристигнале младиот полицаец и неговите колеги, откако неколку минути по несреќата биле информирани за судирот.
Возот се судрил во 23:21 часот по локално време, а тој на местото на настанот пристигнал 10 минути подоцна.
– Многу од сликите што ги видов не сакам да ги споделам јавно. Сцената беше драматична. Видовме херои и ангели. Видов девојка во болки, седеше и се тресеше од шокот што го доживеа – изјави младиот полицаец за грчката телевизија Алфа.
Тој додаде дека посетил друга повредена девојка во болница. Имала изгореници, мисли дека била во првите вагони.
– Се соочивме со многу херои, се сеќавам на едно 20-годишно дете кое остана да ги ослободува луѓето и успеа. Спаси 10 луѓе и продолжи да се обидува – рекол полицаецот.
Најмалку 57 лица, повеќето млади, загинаа во страшен судар на два воза ноќта меѓу вторникот и средата во близина на Лариса, Грција.
