Пејачката Маја Оџаклиевска се заситила од градските случувања, гужвите и секојдневната врева, па одлучила да се повлече во помирни краишта, опкружени со природа и зеленило.
Маја со години живееше во срцето на Белград, на Врачар, но во еден момент донесе одлука да се пресели на село, да ги замени автомобилите со дрвја, а прометните улици со тивок двор полн со цвеќе.
Како што раскажувала и претходно, преселбата од градот ја смета за една од најдобрите одлуки во својот живот, а денес таму го создала својот мал рај во природа.
На село, Маја има пространо имање, убава куќа скриена меѓу зеленило и цвеќе, а обработката на градината ѝ е секојдневно хоби.
„Многу ми годи што ме будат различни птици. Зошто би слушала сирени и труби во градот? Уште додека не се преселив, ѝ се восхитував на Весна Змијанац кога замина на Букуља. Сфатив дека направила најпаметен потег – да живее надвор од градот, во кој секогаш може да дојде кога ќе посака. Јас сум градско дете, но во Скопје пораснав во куќа со двор. Отсекогаш сонував за своја куќа со градина и тоа ми се оствари“, изјави пејачката.
Маја Оџаклиевска е позната и по својот неконвенционален поглед кон љубовта. Таа еднаш откри дека се разделила од партнерите дури 12 пати, а причините речиси секогаш биле исти.
„Имав дванаесет таканаречени бракови. Кога ќе почнеше негодување или однесување што не ми се допаѓа, ги пакував работите во кеси за ѓубре и велев: ‘Работите ти се пред врата’. Чао, довидување и – нов брак“, изјави таа своевремено.
