Светот се простува од славната и неповторлива Тина Тарнер која почина на 83-годишна возраст.
Познати личности од филмската индустрија, пејачи, музичари, фанови изразуваат сочувство на социјалните мрежи, пишуваат „Тина – Simplу the best“, Тина беше лавица на сцената, кралица, а од најдобрата пејачка на светот се простија и НАСА и Белата куќа.
„Едноставно најдобра. Музичката легенда Тина Тарнер блескаше на сцената и во милиони срца како кралица на рокенролот. Нејзиното наследство ќе живее засекогаш меѓу ѕвездите“, објави НАСА.
Портпаролката на Белата куќа пак, Карин Жан-Пјер рече дека смртта на Тарнер била „огромна загуба за сите што ја сакаа и за музичката индустрија“.
Претседателот на САД Џо Бајден изрази сочувство по смртта на музичката икона Тина Тарнер, нарекувајќи ја починатата пејачка „талент кој се појавува еднаш во генерацијата“.
„Џил и јас ја испраќаме нашата љубов и молитви до нејзиниот сопруг Ервин, до останатите членови на семејството Тарнер и до обожувачите ширум светот кои денес тагуваат за жената за која се согласуваме дека беше „едноставно најдобра“, вели американскиот претседател Бајден.
