Фудбалскиот клуб „Севилја“ приреди убаво изненадување за синот на Анастасија Ражнатовиќ и Немања Гудељ, испраќајќи му подарок со клупските обележја.
Во пакетот, наменет за најмладите навивачи, се најде персонализиран мини-дрес со името „Илијан“, како и шорцеви, боди, шал, лигавче, играчки и комплет за хранење – сè во препознатливите црвено-бели бои на шпанскиот клуб.
Анастасија не го криеше воодушевувањето од вниманието, па фотографија од подарокот објави на својот инстаграм-профил.
„Фала, моја Севилја“, напиша таа во описот на објавата, означувајќи го клубот.
Да потсетиме, Анастасија Ражнатовиќ и Немања Гудељ неодамна станаа родители на синот Илијан. Момчето се роди во приватна клиника во Севилја, а неговото доаѓање на свет донесе голема радост во семејствата Ражнатовиќ и Гудељ.
Иако Немања Гудељ летово ја напушти „Севилја“, за која настапуваше од 2019 година и со која ја освои Лигата на Европа, овој гест покажа дека шпанскиот клуб не го заборавил својот поранешен фудбалер и му посака среќа во новото животно поглавје – татковството.
