Познатата пејачка Емина Јаховиќ со години живее во Турција, но често истакнува дека животот во Србија ѝ недостига, па редовно ги посетува роднините и пријателите. Сепак, една болка никогаш не ја преболела – смртта на татко ѝ, кого го загубила како дете и со кого била исклучително блиска.
Таткото на Емина бил ценет кардиолог, а починал како последица од инфаркт. За оваа траума пејачката јавно зборувала само еднаш.
„Јас сум јетим… Тоа на турски значи дете-сираче, кога ќе останеш без татко или мајка во раните години. Мене татко ми многу рано се пресели, бев девојче. Се сеќавам на татко ми“, ја започна својата болна исповед Емина, со грутка во грлото.
Таа откри дека била сведок на неговиот прв инфаркт, што за неа како дете било длабока траума.
„Првиот инфаркт, се сеќавам, го имаше кога бевме сами дома – тој и јас. Тоа беше страшна траума за мене како дете. Знам дека цело време ми беше во рацете кога падна, јас само му зборував да се разбуди… Тоа беше ужасно тешко за мене“, раскажа таа на работ од солзи.
Емина истакна дека загубата на родител во детството остава длабоки последици.
„Смртта на родител кога детето е мало предизвикува огромна траума. Детето не е свесно за моментот на болка. Кога си постар, тоа е болка што со време се прифаќа. Кога си дете, тоа ти останува за цел живот. Многу влијае врз твоите избори, карактерот, стравовите“, сподели пејачката.
Пејачката призна дека раната и денес боли исто како порано.
„Мојот татко беше мојата најголема љубов. Нема ден да не се сетам на него. Многу, многу ми недостига. Пред некој ден бев на свадба, ја видов невестата – моја роднина, прекрасна, како игра со татко ѝ на подиумот. Реков: ‘Боже, вакво нешто никогаш не сум доживеала, вакво нешто постои’. Како да сум го избришала тој дел од животот. Секогаш ми се плаче кога зборувам за него, но не сакам да плачам, бидејќи сè повеќе сум свесна дека заминува само физичкото тело. Тој е тука, душите патуваат“, заклучи Емина.
