Бугарската пејачка и музичка легенда Јорданка Христова на промоцијата на својата трилогија „Исповед“ откри детали од четиригодишното психичко и физичко насилство кое го трпела од покојниот сопруг Георги Стоичков. Таа проговори за повеќе инциденти, за болните моменти кои ги преживеала, но и за силата која ја извлекле нејзините деца. Христова сподели и една тајна што ја чувала шест години – дека е баба на две внучки.
Таа зборуваше за првиот пат кога доживеала насилство.
– Мразам насилство. Никогаш никој во моето семејство не ме удрил. Но кога Георги почна да го истура својот гнев не само врз мене, туку и врз мојот син, знаев дека морам да побарам помош. Не сакав повеќе да бидам тивка.
А потоа додаде како и го скршил носот.
– Се вратив дома околу 22:30 часот. Тој ме чекаше во ходникот. Само зачекори кон мене и ме удри. Од тогаш носот ми е искривен. Тој само шиштеше: Каде се парите? Бев преплашена.
Таа истакна дека се обидел и да ја изгори со цигара.
– Се заштитив со раката, рефлексно. Лузната ја носев со години. Такви работи не се забораваат.
Вели дека најголема мотивација да го издржи насилството биле нејзините деца.
– Тие се моите ’двајца мускетари‘. Во секоја тешка ситуација стоеја зад мене. Синот ми не сакаше да зборувам за него во медиумите и го почитував тоа. Но да, имам две прекрасни внучки – Екатерина и Елена.
Во книгата зборува и за врската со Фидел Кастро.
– Постоеше љубов меѓу мене и Фидел Кастро. Каква љубов – читателите ќе дознаат. Тој беше вистински маж и ќе го почитувам засекогаш.
Вели дека денеска живее мирно, а нејзиниот „лек“ се јогата, музиката и публиката. Сака да се дружи, да пее, да игра. Тоа ја одржува.
