Српската фолк-пејачка Вики Миљковиќ е новото засилување во жирито на музичкото шоу „Пинкови ѕвезди“.
По речиси една деценија мината како ментор и членка на жирито во „Ѕвездите на Гранд“, Миљковиќ донела одлука да го напушти шоуто и да премине во конкуренциската продукција.
Како што објави српскиот таблоид „Курир“, таа прифатила поволни услови што ѝ ги понудила телевизијата Пинк, што било пресудно за нејзиниот трансфер.
Со најавата на новата сезона на „Пинкови ѕвезди“, започнаа и шпекулациите околу составот на жирито. Продукцијата на Пинк веќе активно работи на аудиции и на финализирање на имињата кои ќе седнат во прочуените црвени фотелји и ќе одлучуваат за судбината на младите таленти.
Големо внимание привлече и веста дека во жирито влегува и контроверзниот рапер Драгомир Деспиќ Десингерица, познат по својот специфичен сценски настап и популарноста кај младата публика. Неговото присуство се очекува да донесе шоу и забава од епизода во епизода.
Од друга страна, Дара Бубамара потпиша нов договор со „Гранд продукција“ и останува дел од жирито во „Ѕвездите на Гранд“, што дополнително ја зголемува конкуренцијата помеѓу двете најпопуларни музички платформи во регионот.
Претходно, поранешниот член на „Гранд“, Драган Стојковиќ Босанац, исто така премина на Пинк, каде што повторно се здружи со медиумскиот магнат Жељко Митровиќ.
– Пријателу, нека ни е со среќа. По толку години повторно сме заедно. Тој е еден од најголемите музичари во Србија и ни претставува голема чест. Ова ќе биде најспектакуларната сезона досега – изјави Митровиќ при потпишувањето на договорот.
Босанац додаде дека музиката секогаш мора да предизвика емоции и дека токму тоа ќе биде негов водечки критериум при оценувањето.
Со ангажманот на Вики Миљковиќ, новата сезона на „Пинкови ѕвезди“ добива дополнителна тежина и засилува битката за гледаност меѓу Пинк и Гранд. Публиката, пак, може да очекува возбудлива есен исполнета со музика, драма и нови ѕвезди.
