Во една од најемотивните епизоди од поткастот „Елизабетско“, бугарскиот пејач Васил Трајанов Бојанов, познат како Азис, се појави без „маски“, само како човек кој искрено и болно зборува за својот живот.
Разговорот ги допре темите на кариерата, љубовта и родителството, но најсилно одекна неговата потресна исповед за семејното насилство кое го одбележало неговото детство.
„Пораснав во дом исполнет со брутално насилство. Сè поради еден маж кој не можеше да се контролира,“ вели Азис, зборувајќи за својот татко.
Тој сведочи како со свои очи гледал како татко му ја претепува мајка му, сцена што засекогаш се врежала во неговото сеќавање.
„Да гледаш како ја тепи мајка ти со голи раце… Како да го засакаш тој човек? Никогаш не го сакав. Секогаш чувствував срам од него. Дури и кога почина – не почувствував ништо“, вели ѕвездата.
Како дете, се обидувал да ја заштити – се сеќава како зел нож и му се заканил на татко му.
„Му реков – ќе те убијам. Не ја тепај мама“, вели Азис.
Иако времето поминало, раната останала отворена.
„Татковци, мажи што кревате рака на жените – запомнете, вашите деца еден ден нема ни да ве погледнат. Како што ни јас не го погледнав татко ми“, потенцира бугарскиот пејач.
Азис открива дека со години се обидувал да биде „нормален“, односно хетеросексуален, само за да не предизвикува срам кај мајка си. Но колку и да се борел со себеси, не успеал. Денес се прифаќа таков каков што е.
Во срцето на неговиот живот стои мајка му, жената што го заштитувала дури и кога самата била незаштитена. Денес нивната врска е полна со почит, разбирање и љубов.
„Носиме иста душа,“ вели Азис.
