Шест и пол месеци по трагедијата во Кочани, професорката по пеење во ДМБУЦ „Илија Николовски – Луј“, Ана Костадиновска, која ја преживеа несреќата, објави емотивно видео од своите ученици.
На снимката се гледа дел од учениците од 3 и 4 година, теоретски оддел, како на час по џез и популарна музика ја изведуваат песната „Север и југ“ од групата „ДНК“.
„Од срце за скршеното срце“, напиша Ана на својот инстаграм-профил, додавајќи дека токму нејзините ученици знаат како да пренесат емоција со музика.
Костадиновска редовно на социјалните мрежи споделува фотографии и видеа од своите пријатели и колеги кои загинаа во пожарот, меѓу кои и Сара, за која често вели дека ѝ била како сестра. Со тоа им оддава почит на загинатите, но и отворено покажува дека сè уште минува низ голема болка.
