Војводата од Кембриџ раскажа како ја надминал тремата додека држел јавни говори, благодарение на својот слаб вид. Вели дека поради диоптријата не ги гледал лицата на луѓето пред кои зборувал, што му помогнало да се опушти.
Принцот Вилијам истакнува дека лицата во публиката му биле само матни обриси и дека на тој начин ја победил тремата, а сè е објавено во новиот документарец на Би-би-си.
„Видот почна да ми слабее кога раснев, но уште не бев навикнат да носам контактни леќи додека работев. Кога држев говори, не гледав ничие лице. Тоа ми помогна зашто не можев да видам ни кој ме гледа, ниту каков израз на лицето има“, раскажа наследникот на британската круна.
Принцот последнава година во Велика Британија ја промовира иницијативата „Heads Up“, а новинарите на Би-би-Си го следеле насекаде и го направиле документарниот филм „Фудбалот, принцот Вилијам и нашето ментално здравје“.
Иницијативата се занимава со менталното здравје и ги поттикнува фудбалерите да прозборат за своите проблеми за да им помогнат на колегите.
Војводата во документарецот се осврна на проблемот со самоубиствата и им изрази сочувство на семејствата кои ги изгубиле своите најмили на тој начин.
