Српската актерка Љубинка Клариќ пред неколку години отворено проговори за периодот кога нејзиниот син Коста поминувал повеќе од осум часа дневно играјќи видеоигри. Откако забележала промени во неговото однесување, таа решила да побара стручна помош.
Како што раскажала актерката, проблемот бил особено изразен за време на училишните распусти, кога Коста поминувал најголем дел од денот пред компјутер.
„Денес е тешко да се одгледува дете. Коста моментално оди кај психолог за одвикнување од видеоигри. Поминуваше повеќе од осум часа дневно пред компјутер, најмногу за време на летните распусти“, изјавила Клариќ во интервју пред неколку години.
За неа, долгите часови поминати во виртуелниот свет не биле суштината на проблемот, туку сигнал дека зад таквото однесување се крие нешто друго.
„Игрите се последица, а не причина. На пример, кога детето не добива нешто што му е потребно во реалниот живот, тогаш бега во виртуелниот свет“, објаснила таа.
Според актерката, во случајот на нејзиниот син причината била недостигот од пријатели и потребата за дружење, која тој почнал да ја задоволува преку интернет.
„Кај Коста причината за бегството во светот на игрите беше тоа што немаше доволно пријатели, па ги стекнуваше преку интернет. Тоа му одговараше бидејќи сите непријатни ситуации ги решаваа така што ќе се исклучеа од компјутерот и ќе си заминеа, додека во реалниот живот не оди баш така“, раскажала Клариќ.
Еден од знаците што особено ја загрижил бил променетото расположение на нејзиниот син.
„Цело време беше раздразлив“, признала актерката.
Откако побарале помош од психолог, Коста постепено го намалил времето што го поминувал пред компјутер. Според Клариќ, од повеќе од осум часа дневно стигнал до околу два часа, а промената се одразила и врз неговото расположение.
„Со помош на терапијата, времето пред компјутер го сведе на два часа и стана поинакво дете! Весел е, а сите негови убави особини, за кои бев сигурна дека ги има, конечно дојдоа до израз“, раскажала таа.
Актерката тогаш ги советувала и другите родители кои забележуваат слични промени кај своите деца да не го игнорираат проблемот и, доколку е потребно, да се обратат кај стручно лице.
Коста подоцна направил голема промена и се преселил кај својот татко Небојша во Соединетите Американски Држави, каде што го продолжил школувањето. Иако разделбата тешко ѝ паднала, Клариќ вели дека одлучила да ја поддржи желбата на својот син бидејќи гледала дека тој е среќен.
„Ако тој е среќен таму, и јас сум среќна. Ако е среќен, и јас сум среќна, каде и да е на планетата“, порача актерката.
