Наум Петрески, Зуица Лазова, Ленче и Горан Кукуќ, Дац и Александар, Дани Димитровска, Сузана Гавазова, Ѓоко Танески, Миле Кузмановски, Полина Тасева се дел од проектот „Музика за душа“ на групата „Дрим тим“ и пријателите.
Најголемите хитови на овие пејачи, плус познати македонски народни песни преработени во боемски дух се одличен избор за периодот на празниците што следат, рекоа од „Дрим тим“ на вчерашната промоција во скопскиот ресоран „Воденица“.
-Многу ми е драго што вечерва сме собрани токму овде, местото каде што и се роди нашиот нов проект насловен „Дрим тим и пријателите“. Оваа промоција требаше да се случи многу порано, но како што знаете, животот понекогаш ни носи и тешки моменти, а трагедијата во Кочани не нè остави рамнодушни. За музичарите најубавата награда е аплаузот, затоа ве молам за еден силен аплауз за сите наши починати колеги и сите жртви во оваа трагедија. Вечерва сме тука, со новиот проект кој ни значи многу повеќе од само музика. Овој проект е нешто што го носиме во срцето — тој го означува заокружувањето на еден долг пат, 25 години “Дрим тим“. 25 години музика, многу сцени, многу пријатели, многу љубов. Патување полно со предизвици, радости и незаборавни моменти. Благодарни сме секому кој бил дел од ова патување. Пред нас е период на празници, моменти со нашите најблиски, па во тие мигови посакуваме да имате парче убава македонска музика за добро расположение, за топлина и радост во домот“, рече на промоцијата пејачот на „Дрим тим“, Дејан Николоски- Чуле.
