Македонскиот пејач Никола Станишиќ, кој победи во последната сезона на музичкото натпреварување „Ѕвездите на Гранд“, во интервју за српскиот „Курир“ проговори за својот пат од анонимност до слава, откри дел од личната приказна, и сподели планови за иднината.
Неговата победа, како што вели, ја почувствувал уште во полуфиналето, кога добил огромна поддршка од целиот регион – од Македонија, Србија, Босна и Херцеговина, па и пошироко. Иако не ја исклучуваше можноста да не победи, вели дека љубовта и препознавањето од публиката му се доволни: „И да не победев, добив цел Балкан. Тоа што ме засакаа, што слушнаа за мене – тоа ми е најголемата победа“.
Станишиќ беше дел од тимот на Цеца Ражнатовиќ, со која веќе од порано сакал да соработува бидејќи, како што вели, пораснал со нејзините песни. Цеца, според него, му била голема поддршка и во тешки животни моменти, иако не сакаше да открие детали за личната трагедија што ја поминал за време на натпреварувањето.
Интересно е што неговиот татко, кој живее во Македонија, не бил присутен на финалето поради работни обврски, но сепак му бил силна поддршка во текот на целото натпреварување. Станишиќ објаснува дека татко му е Србин роден во Гњилане, кој поради војната се преселил во Македонија, каде што и тој е роден.
„Горд сум што сум Македонец и Србин – и двете земји ги чувствувам како свои,“ додава младиот пејач, кој сега е и српски државјанин.
Во однос на иднината, тој најави нова песна под капата на „Гранд“, а потоа и четири свои нумери за кои, како што рече, конечно дошол вистинскиот момент. Го споредуваат со пејачот Адил, што му годи, но љубовта, вели, во моментов не му е приоритет – фокусиран е целосно на кариерата.
На прашањето која ѕвезда од „Гранд“ најмногу успеала досега, без двоумење го посочи Дарко Лазиќ, со кого веќе имал заеднички настап.
„Ми беше чест. Дарко ни даде ветер во грб – тоа не се заборава,“ вели Станишиќ.
