Долгогодишното пријателство и музичка соработка помеѓу бугарските поп-фолк ѕвезди Деси Слава и Азис дојдоа до својот крај. Како што пренесуваат медиумите, причината за караницата е одлуката на Азис во последен момент да се повлече и да одбиде да настапи на големиот претстоен концерт на Деси Слава во салата „Арена 8888“ во декември.
Двојката, која со години делеше сцена и чии заеднички дуети се сметаат за култни на балканската музичка сцена, имаше договорено соработка уште во март оваа година, кога Азис свечено ѝ вети дека ќе ги изведат своите хитови заедно пред публиката. Сепак, ситуацијата се променила кога тој ја известил дека нема да биде дел од концертот, користејќи го како изговор тоа што на настапот се поканети и други колеги.
Ова образложение не ја убедило пејачката, особено со оглед на тоа што Азис претходно гостуваше на големиот соло-концерт на колешката Галена во истата сала, каде што исто така имаше и други гости изведувачи. Како што наведуваат блиски извори од индустријата, Деси Слава била длабоко разочарана од неговиот потег, по што одлучила дефинитивно да стави точка на нивната блиска врска и пријателство.
