Актерката Аманда Бајнс шест месеци живееше скриена од медиумите и јавноста.
Пред неколку дена таа беше фотографирана во прошетка со свршеникот Пол Мајклс и никој не можеше да ја препознае.
Причина за тоа е долгата борба со зависности од опијати, лекови и алкохол. Иако таа е непрепознатлива, сепак многумина забележаа дека изгледа подобро за разлика од претходните години, а за тоа тврдат дека е заслужен свршеникот Пол, кој ѝ помага во борбата со зависностите.
Тие се свршија на Денот на вљубените оваа година, а наводно Аманда ги поправила односите и со родителите.
Аманда на седум години ја започна кариерата која одеше во нагорна линија, но не успеа да ја избегне судбината на многу детски актерски ѕвезди. Пред девет години престана да се занимава со актерство, а пред шест години се случи инцидент, кој беше кулминација на нејзините психички проблеми.
Стана позната по небулозните изјави на Твитер и напади кон други јавни личности, беше фатена како вози под дејство на алкохол без дозвола, а врв беше кога на непознат човек му подметна пожар во дворот, во кој настрада и нејзиното кученце.
Откако замина на лекување, а кариерата ѝ пропадна, таа живееше со 50 долари дневно што ги добиваше од родителите. До оваа година со судски налог живееше под надзор од мајка ѝ.
Аманда неодамна заврши моден дизајн и се обидува да се врати во нормален живот.
