Култниот филм „Однесено со виорот“ е отстранет од ХБО Макс, новиот стриминг сервис, кој неодамна го лансираше куќата „Варнер брос“, како ривалска платформа на Нетфликс и на Дизни +.
Причината за ваквиот потег е начинот на кој е прикажано ропството во филмот што има добиено осум Оскари.
Повод за остранувањето беше натписот на Џон Ридли за ЛА Тајмс, во кој „Однесено со виорот“ го опиша како „филм, кој кога ќе се занемарат хорорите на ропството, прави паузи само за да ги претстави најболните стереотипи на луѓето со темна боја на кожата“.
Во соопштението до јавноста во кое се образложува потегот на привремено отстранување на антологискиот филм „Однесено од виорот“ од 1939 година, со Вивиен Ли и Клерк Гејбл во главните улоги, од ХБО Макс велат дека ги послушале повиците од јавноста, и дека иако филмот е „производ на своето време“, тој содржи „етнички и расни предрасуди“ кои биле погрешни тогаш, а се погрешни и денес.
„Вакви расистички прикази беа погрешни тогаш, а погрешни се и сега, па мислиме дека би било неодговорно ваква содржина да се прикажува на нашата платформа“, одговориле од ХБО Макс.
Истовремено, се вели дека филмот ќе се врати на платформата на неодреден датум, но придружен „со дискусија за историскиот контекст“.
