Оваа година ќе ни понуди изобилство на филмови кои предизвикуваат страв и ужас, но судејќи по морбидниот трејлер, „Antebellum“, веќе се издвојува како филм кој би можел и да го добие епитетот „најстрашен“, кога се во прашање хорор приказните за 2020 година.
Не се познати никакви детали за сценариото, освен тоа дека режијата ја потпишуваат Џерард Буш и Кристофер Ренц, а ќе им се придружи и Шон Мекитрик, познат продуцент на хорор филмови, кои веќе ни донесоа многу возбудливи моменти.
Ниту самиот трејлер не открива многу за филмот, а она што може да се заклучи е дека филмот ја следи приказната за успешна писателка која е заробена на југ во Америка во период пред избивање на граѓанска војна, која се води поради ослободување на афроамериканските робови.
„Antebellum“ инаку е латински збор кој означува предвоен период.
Главната улога во филмот ја доби талентираната актерка и пејачка Џанел Моне, а пред камерата и се придружуваат уште и Џена Малоун, Ерик Ланг, Џек Хјустон, Криси Клемонс и Габореј Сидибе.
Премиерата на филмот е најавена за 24 април во САД.
