Австриската полиција приведе две лица кои имале планови за исламистички терористички напад за време на концертите на американската пејачка Тејлор Свифт во Виена, кои ќе се одржат на 8, 9 и 10 август во австриската престолнина, пренесе дневниот весник „Кронен цајтунг“.
Според „Кронен цајтунг“, едниот од нив е 19-годишен Австриец со „македонски корени“, кој „живеел со семејството во градот Терниц“. Тој бил уапсен „под силно сомение за тероризам“. Вториот осомничен е Австриец од Виена.
Франц Руф, директор за јавна безбедност во австриското Министерство за внатрешни работи, изјави дека властите се свесни за „подготвителните дејствија“ за можен напад, „и дека фокусот на 19-годишниот сторител бил на концертите на Тејлор Свифт во Виена“.
Руф потецираше дека 19-годишникот се заколнал на верност на Исламската држава. Се смета дека австрискиот државјанин се радикализирал на интернет.
Руф рече дека хемиските супстанци се обезбедени и дека се проценуваат. Не беа дадени повеќе детали.
