Евровизиската претставничка на Бугарија, 27-годишната Дара, во второто полуфинале ја изведе интересната нумера „Бангаранга“ и си трасираше пат во големото финале.
Дара ги освои симпатиите на публиката со својата енергија и широката насмевка, која ја носи и надвор од сцената.
Нејзиното вистинско име е Дарина Николаева Јотова, родена е во Варна во 1998 година. Од рана возраст се занимава со музика, а внимание привлече уште во 2015 година, како 17-годишна, кога го освои третото место во бугарскиот „Икс фактор“.
Досега има два албума, а учествувала и во бугарската верзија на шоуто „Твоето лице звучи познато“, додека од 2021 година е вокален тренер во шоуто „Гласот на Бугарија“.
Во тоа е многу успешна, па за четири години од натпреварувањето двапати успеала да ги доведе своите натпреварувачи до победа.
Што е „Бангаранга“?
Дара е избрана да ја претставува Бугарија на Евровизија на национален избор, а потоа кон крајот на февруари изведе три песни што ги подготвила.
„Бангаранга“ освои најмногу гласови од публиката и жирито, а станува збор за енергична денс-поп песна за самозајакнување, надминување на анксиозноста и „среќен бунт“.
– „Бангаранга“ е поп музика со фолклорни елементи – објасни Дара за „Independent“. – Самиот збор потекнува од јамајкански сленг и значи „бучава“, „метеж“, тоа е прекрасен хаос. Има сурова, фонетска моќ што оди подалеку од преводот, ја чувствувате уште пред да ја разберете.
Како што истакнува, кога размислува за својата песна, таа ја потсетува на бугарскиот обичај каде што маскирани мажи изведуваат традиционални ритуали за да ги избркаат злите духови.
– Енергијата е огромна, речиси застрашувачка, а сепак целосно радосна, заедничка, целосно жива. Тоа е бангаранга. Тоа е бучава, оган и ритам, распоредени како сила на доброто – вели пејачката. – „Бангаранга“ е бучава, но среќна. Покана, а не закана. Влезете, препуштете се на светлата, никој вечерва не спие.“ – додава Дара.
