Американската актерка Амбер Херд се соочува со нова правна битка откако нејзината осигурителна компанија одби да ѝ исплати до 1 милион долари осигурување за да ги покрие трошоците за судењето против поранешниот сопруг актерот Џони Деп.
Осигурителната компанија New York Marine and General Insurance Co. во петокот поднела тужба против актерката пред федералниот суд, велејќи дека не мора ништо да ѝ исплати бидејќи нејзиниот пораз на судот во постапка која ја водел нејзиниот поранешен сопруг против неа, бил резултат на нејзините постапки.
Во 2019 година, Деп побара отштета од 50 милиони долари од неговата поранешна сопруга поради нејзиниот едиторијал објавен во Вашингтон пост во декември 2018 година, во кој таа се опиша себеси како јавна личност, жртва на семејно насилство.
Иако во текстот не го именуваше Деп, ѕвездата од „Пиратите од Карибите“ на суд тврдеше дека е јасно дека тој е предмет на коментарот.
Минатиот месец, на Деп му беа доделени повеќе од 10 милиони долари отштета за клевета по шестнеделното судење.
Осигурителната компанија тврди дека е должно да исплати осигурување по полиса освен ако осигураникот сам не ја предизвикал штетата, како што е случајот со Херд, повикувајќи се на калифорнискиот закон според кој осигурителната компанија „не е одговорна за загубите кои се псоледица на свесен чин на осигуреникот“.
