Археолозите пронашле добро сочувани тела од двајца мажи кои настрадале во вулканската ерупција што го уништи древниот римски град Помпеја, соопшти италијанското Министерство за култура.
Едниот маж најверојатно бил од повисок општествен статус, на возраст меѓу 30 и 40 години и на него останале зачувани делови од волнената наметка.
Другиот маж е помлад, на возраст меѓу 18 до 23 години, и бил облечен во туника. Кај него се забалежени оштетувања на рбетниот столб, а неколку пршлени му биле скршени. Се претпоставува дека бил роб и морал напорно да работи.
Остатоците се пронајдени во подземна просторија во Чивита Џулиана, 700 метри северозападно од центарот на Помпеја.
Забите и коските од мажите се добро сочувани, а во празнините во кои било мекото ткиво е ставен гипс, кој подоцна овозможил појасно да се видат контурите на телото.
Директорот на археолошкото наоѓалиште Масимо Осана рекол дека тие починале од термален шок, што се забележувало и по стиснатите стапала и дланки.
„Веројатно овие две жртви сакале да се засолнат од пирокластичниот бран“, рекол Осана.
Во Помпеја, 23 км југоисточно од Неапол, во времето на ерупцијата живееле околу 13.000 луѓе.
