„Битката на Неретва“ е еден од најамбициозните филмови на поранешна Југославија. Најголемите sвезди на светот во тоа време, Јул Бринер, Франко Неро и големиот Орсон Велс им се придружија на актерските легенди во регионот, а постерот за филмот го нацртал Пабло Пикасо.
Филмот Битката на Неретва се смета за најдобар и најскап филм кој е снимен во Југославија. Постигна голем меѓународен успех, освои бројни награди и беше номиниран за Оскар.
На Пабло Пикасо му било понудено да го изработи постерот за филмот.
Откако го изгледал филмот и ги проучил настаните, Пикасо потврдил дека ќе го направи плакатот, но и дека ќе земе дел од неговата слика Сабињанка, а побарал само бојата на плакатот да биде црвена.
Кога Пикасо го прифатил предлогот филмската екипа се нашла во паника бидејќи морале да смислат како да му платат на Пикасо.
За среќа познатиот уметник не барал никаков хонорар, единствено што побарал биле 12 одбрани шишиња вино од тогашна Југославија.
На премиерата на филмот што се одржала на 29 ноември 1969 година, на отворањето на Центарот за култура и спорт „Скендерија“ во Сараево, покрај Тито и филмската екипа наводно присуствувале Софија Лорен и Омар Шариф.
