Лепа Брена вчера објави видео од себе како го вози култниот „голф еден“ на својот инстаграм-профил. Имено, Брена одржа концерт во Градската арена „Хусејин Смајловиќ“, а непосредно пред настапот, таа сподели видео од себе како го вози култниот автомобил на социјалните мрежи, потсетувајќи се на почетокот на нејзината кариера.
„Јас и мојот ‘голф кец’ повторно. Поминаа толку многу години, а како сè уште да го слушам тој звук на моторот од Сараево. Отидов на моите први проби, први настапи, први соништа во него. Немаше луксуз, но имаше срце и песна што носеше сè“, напиша Лепа Брена на почетокот на објавата.
„Денес, кога седнувам во него, ме враќа во времето кога се правеше од љубов, кога сцената беше поголема од кога било, а публиката беше семејство. Одам на проверка на звукот, како порано, само со повеќе спомени во ретровизорот. Истата насмевка, истата страст, само малку повеќе живот во песната. Мојот вокмен е сè уште под перницата. Ве сакам, вашата Брена“, додаде таа.
Инаку, Брена синоќа одржа концерт во Зеница, а својот воведен говор му го посвети на неодамна починатиот Халид Бешлиќ.
