Оперската првенка Весна Ѓиновска-Илкова прослави 28 години љубов со сопругот Љубомир, споделувајќи колаж од нивни заеднички фотографии и емотивна порака посветена на семејството.
„И убавото чувство продолжува. 28 полни години љубов, почитување, поддршка. Нека ни се множат, поминавме и ќе поминеме уште убави моменти! Децата ни се богатството, иднината“, напиша Ѓиновска-Илкова.
Весна и Љубомир се родители на двајца синови, Ведран и Борјан. Сопранистката и претходно зборувала за семејството и за времето што го поминува со сопругот. Во едно интервју, таа рече дека Љубомир е машински инженер и дека двајцата ја делат љубовта кон природата.
„Кога не сме на работа обично сме некаде на планина со мојот сопруг Љубомир, кој е машински инженер. Синовите Ведран и Борјан само понекогаш нè дружат. И многу често сме сами или со пријатели“, раскажа Ѓиновска-Илкова.
Колку семејството ѝ е важно, таа особено нагласи во едно интервју од периодот на пандемијата и лекциите што ги извлекла од него, Ѓиновска-Илкова рече дека сфатила оти семејството е најважно, а сè друго станува споредно. Во тој период раскажа и дека времето дома го поминувала со децата, играјќи карти, шах и табла.
„Имам една голема желба, моите синови да бидат реализирани личности. Тоа е сонот на Љупчо и Весна“, изјави таа.
Ѓиновска-Илкова е една од најистакнатите македонски оперски уметници, првенка на Националната опера и балет и професорка на Факултетот за музичка уметност. Зад себе има повеќедецениска кариера и повеќе од 20 главни оперски улоги.
