Разговараме со Иле, музичар, и со неговата сопруга Весна, вработена во „Веро“, и двајцата страсни љубители на природата, растенијата, цвеќињата, а тоа се огледува и во нивниот преубав двор од околу тристотини квадратни метри.
– Одгледувањето на цвеќиња не ни е професија, туку го работиме од љубов кон цвеќињата и сакаме дворот да ни изгледа убаво – ни открива Весна.
Дворот се простира на околу 300 квадратни метри и се наоѓа во битолската Лавчанска населба.
Изобилува со цвеќе и растенија, од дрво на животот, палми, сурфинија, сардели, џунџулиња, пламенчиња и бомбончиња, а во дворот доминираат разни видови на борчиња кои како што велат сопружниците „редовно ги резиме и обликуваме во различни форми“.
– Имаме секојдневни обврски во дворот но кога се работи со љубов ништо не е тешко, децидна е Весна.
– Сакаме секогаш дворот да ни изгледа убаво – ја дополнува Иле – тревата се коси еднаш неделно, борчињата се стрижат три пати годишно, фонтаната се чисти два пати месечно и секојдневно има наводнување.
Совет од Иле и Весна за сите оние што сакаат да почнат да се занимаваат со одгледување цвеќе?
– Да се работи со љубов и да се посвети големо внимание за редовно наводнување, прихрана, прскање од разни штетници, соодветни саксии – советуваат тие.
Инаку, Иле и Весна се членови на Фејсбук групата …ДВОРЧЕТО…, група која ви ја препорачуваме да си станете член и да се изнагледате преубави објави!
Уживајте во фотогалеријата.
Фото- приватна архива
