На изложбата на уметницата Моника Блажевска на 26ти јули во „Оз Гарден Корнер“ со почеток во 20 часот, ќе бидат претставени дваесетина уметнички дела во различни техники и триесеттина уникатни модни додатоци од свила во комбинација со парчиња облека.
Младата уметница Моника Блажевска ја подготвува својата четврта самостојна изложба, која повторно е спој на модата и уметноста, а на тема инспирирана од Елена Тројанска која инаку, важи за една од најубавите жени од старогрчката митологија.
Зошто Елена?
– Затоа што секоја жена сака да биде убава, затоа и сум инспирирана од Елена Тројанска. Не само нејзината убавина туку и нејзината посебна енергија која освојува територии е доволен предизвик и тема за развој на моето сликарство и модни креации.
Колку креации ќе бидат претставени на изложбата и каква е поврзаноста на модерните дизајни со античката традиција и од друга страна, со уметничките слики што ќе ги претставиш?
– Главен мотив е анатомијата на коњот која е претешка и ја работам со месеци. Женската силуета исто така е насликана во еден колоритен и енергичен стил, т.н. експресионизам. Материјалите пак, играат голема улога во пренесувањето на едно античко време. Ленено платно, дрво, свила. Ќе бидат претставени околу дваесет уметнички дела во различни техники и триесеттина уникатни модни додатоци од свила во комбинација со парчиња облека.
Кому е наменета колекцијата на слики, а кому дизајните?
– Мојата уметност и израз е поинаков и секогаш уникатен. Создавам уметност за сите оние кои уживаат во неа и ја доживуваат со воодушевување. Кога некој ќе подзастане и ќе заборави што сакал да каже, или пак останал без зборови, тоа е уметност. Ете тоа е Елена. Моќ. Енергија.
Кои според тебе се македонските современи Елени кои би можеле да ги носат креациите?
– Имаме многу убави македонски Елени. Секоја само треба да знае да ги носи креациите. Можам да ја искоментирам помладата генерација дека е многу храбра, знаат што сакаат уште на дваесет години.
За најава на колекцијата самата послужи како модел за фотосесија, а во преден план е сексапилноста. Како ја дефинираш сексапилноста?
– Сексапилот е она што зрачи. Јас, во улога на Елена, се потрудив низ фотографија да пренесам уметност и креација во антички стил. Да, навистина, дел од моето тело е видливо голо, но сепак има доза на хуманост.
Кои се денешните најголеми предизвици на една млада уметница да се избори за своето место на уметничката сцена?
– Одамна го имам позиционирано своето место во уметноста. Стартував самостојно на свои дваесет и пет години, и оттогаш до денес низ многу предизвици и проекти веќе осум години го градам својот бренд под името „Бм Дизајн Моника”, полека но сигурно.
Фото Аверел
