Минова Невенка е пензионерка, родена во 1939 година, а има огромна љубов кон цвеќињата и природата.
Вели дека со цвеќиња се занимава од своја 20 годишна возраст.
Невенка има прекрасен двор кој се простира на околу 140 квадратни метри, во Гевгелија, а за сè да биде „цакум пакум“ во ова цветно царство, одговорна е самата таа. Нејзиниот сопруг, за жал, починал пред 19 години и целата грижа за се што е поврзано со домот и дворот е препуштено на неа. Има две сакани ќерки, Бети и Гордана, кои се мажени и имаат свои семејства. Но тие се секогаш тука кога треба да се помогне.
Моментно во дворот на Невенка доминираат петуниите и бегониите.
– Сега, кога е потопло, на дворот се посветувам околу 2- 3 часа секојдневно, и тоа во утринските часови – ни открива оваа пензионерка ос огромна животна енергија.
Омилено цвеќе на Невенка ѝ е лалето, „тоа за мене е нешто божанствено“, вели таа. Затоа и го нацртала на нејзината чешма. Да, добро прочитавте, Невенка има уметничка душа. Всушност, сè што е нацртано на камењата, на старата канта за ѓубре, на чешмата е од нејзина рака.
Што се однесува до предизвиците поврзани со дворот, тоа за Невенка се „дворот да биде убаво среден, добра естетика и симетрија да има меѓу сите предмети во дворот“.
Браво за нашата креативка!
Стигнуваме до советот од оваа искусна „цвеќарка“ за оние кои сакаат да почнат да се занимаваат со градинарство.
– Ако имаат омилено цвеќе нека почнат од него, бидејки секогаш треба да работиме со љубов. Ако не, можат од било кое цвеќе да почнат, бидејќи сите цвеќиња се убави – вели таа.
Инаку, до Невенка стигнавме преку Бети, ќерката на Невенка.
Бети е членка на Фејсбук групата …ДВОРЧЕТО…, група која ви ја препорачуваме да си станете член и да се изнагледате преубави објави!
Уживајте во прекрасната фотогалерија од гевгелискиот двор на Невенка.
Фото – приватна архива
