Денес сме во скопската населба Ѓорче Петров, и уживаме во неделното утро во друштво на Олгица Јордановска, во нејзиниот двор кој се простира на 50 квадратни метри.
Олгица е занаетчија, се занимава со производство и продажба на највкусното нешто – кори, јуфки, лазањи, кадаиф…
Прекрасно е да се зборува и на оваа тема со нашата цветна дама, зашто не се чести пригодите кога може да сретнете некој кој со толку страст ја чува македонската гастрономска традиција.
– Сега, поради коронакризата намалена е побарувачката бидејќи соработувам најмногу со ресторани и кетеринзи, – искрена е Олгица, но затоа пак, пред нас е сезоната на славите, а со тоа и сезоната на корите.
Ѝ посакуваме, од срце, да има полни раце работа!
Секако, преминуваме на нашата тема – дворчето.
Ја прашуваме, од кого ја наследила љубовта и мајсторството за одгледување цвеќе.
– Како тинејџерка, мајка ми ми ја всади љубовта кон одгледување цвеќиња, се сеќава Олгица.
И оттогаш таа љубов си трае и си трае…
Одговорноста за дворот да личи вака каков што е, раскошен и миризлив, сама си ја носи на свои „плеќи“. Но, кога нешто се сака, работата е задоволство.
Во дворот на Олгица доминираат сарделите, розите и ползавците. Неа пак, омилени ѝ се сокулентите, розите и сарделите.
Во текот на зимата, овие убавици се грижливо спастрени во домот, распоредени во собите, особено оние понежните, а еден дел пак, се згрижени во подрумот.
Совет од Олгица за оние кои сакаат да почнат да се занимаваат со градинарство и одгледување на цвеќиња?
– Јас почнав со сарделите, како едни од оние цвеќиња кои не бараат многу нега и искуство, па сарделите ги препорачувам за почетници, низ насмевка ни вели оваа позитивна цветна дама.
Инаку, Олгица е членка на Фејсбук групата …ДВОРЧЕТО…, група која ви ја препорачуваме да си станете член и да се изнагледате преубави објави!
УЖИВАЈТЕ ВО ФОТОГАЛЕРИЈАТА!
ФОТО – ПРИВАТНА АРХИВА
