Никола Перевски-Пере од „Нокаут“ сподели емотивен спомен на Кирил Поп-Христов Кили, актерот кој почина завчера на 58 години во Еквадор.
Кили бил гостин на еден од албумите на „Нокаут“ и тоа симболично во песната „Животот е убав“ (La Vitta e Bella). Тој во песната бил гостин пијанист.
А Пере сподели и заедничка слика со Кили и до неа напиша: „Имаше во Кили ум, смеа и нешто ретко човечко што не се заборава, што останува меѓу луѓето како добрина. Мирен пат за Кили“, напиша музичарот.
Кили беше мултиталентиран уметник и еден од најдобрите македонски современи актери. Тој зад себе остави низ впечатливи улоги кои ќе се паметат – во „Тетовирање“, „Бал-кан-кан“, „Збогум на 20-от век“ „Панкот не е мртов“, а оствари и блескави театарски улоги во „Ричард Трети“, „Злосторство и казна“, „Ослободување на Скопје“… Забележливи се и неговите улоги во телевизиската продукција: „Трст виа Скопје“, „Бумбари“, „Досие Скопје“…
