Музичарот Петар Младеновски или Пеце од „Суперхикс“ раскажа емотивна приказна за Васил Рингов, фудбалската легенда која почина вчера, по кусо боледување во Скопје.
-На еден свадбен жур во некогашното МКЦ-клуб ресторан пред 10-ина а можеби и повеќе години свирам и по свирката, надвор дур пијам пиво ми приоѓа еден господин и си правиме муабет. Ама онака .. во темнина. И ми вика
– “Добро бе не ме познаваш?”
– “Па… Вака во темницава сте ми познат”
– “Па ти…Вардарец ли си?”
– ” Сум…Ауууу ВАСИЛ РИНГОВ!!! Леле извинете ве молам! ” (се насмевна и наздравивме)
Еден од ретките кој вистински и безусловно го сакаше и живееше за Вардар а не знам колку и дали за тоа доби некакво признание. Вечна Слава и незаборав! Да живее Вардар и Македонија!- напиша Петар Младонвски-Пеце.
Со својот пријател, се прости и неговиот колега, златната копаќка Дарко Панчев:
-Васе, не е фер, нè напушти прерано. Ќе ни фалиш, ќе има голема празнина во нашите седенки, нашите спортски муабети, раскажувања на анегдоти. Беше еден од најдобрите напаѓачи во 80-тите години во „екс-ју“ лигата, а заедно со тебе во Вардар бевме и веројатно најопасен и најдобар тандем во еден период.
Нѐ напушти, но зад себе остави длабока фудбалска трага и огромно спортско богатство за Македонија. Нека ти е лесна земја, а вечна слава секако имаш- рече Панчев.
