Кога ќе се качи на малечкото столче кое ѝ претставува театарска или музичка сцена и пее, ме потсетува на она што мојата мајка ми го има кажувано за моето рано детство“, вели Сузана Спасовска за внуката Клара.
Сузана Спасовска е многу горда на својата внука Клара, од ќерката Теона и зетот Виктор. Откако се роди пред нешто повеќе од две години, Клара е центарот на нејзиниот свет. Фолк-дивата, која е вработена во ансаблот „Танец“ и одржува успешни концерти со колегите е секогаш оригинална, во неколку наврати има кажано дека не сака да биде ничија копија. Онаа што изгледа дека ќе ја наследи таа нејзина музикалност и оригиналност, е токму внуката Клара.
-Клара има две години и пет месеци и е темпераментна, насмеана, интересна, многу музикална и родена глумица. Си пее песнички што ги учи во градинка или од детските програми, и кога сум со неа уживаме кога пееме и играме“, ни раскажа Сузана за времето поминато со својата внука. Секој слободен момент, Сузе и Клара го поминуваат квалитетно.
-Кога ќе се качи на малечкото столче кое ѝ претставува театарска или музичка сцена и пее, ме потсетува на она што мојата мајка ми го има кажувано за моето рано детство“, вели Сузе и со радост се потсетува на времето кога таа била мала.
-Кога сме оделе во маркетот да купуваме намирници, понекогаш кога ќе ме виделе така детски разигана, барале од мене да отпеам песничка, па дури ме качувале и на касата да пеам и играм. Тоа била мојата сцена. Вообичаено, освен некоја кратка детска песничка од тоа време, сум знаела да ја запеам и старата народна песна „Море што ти текна, што побегна”, песна која мајка ми додека шиеше си ја пееше, а јас сум си ја запомнила. Бев најрадосна за сите лижавчиња, бомбони, чоколатца, а и по некоја ситна паричка на крајот на мојот “сценски настап”“, се сеќава Спасовска и низ својот пример ја објаснува големата сличност на една баба и внука, како две блиски приказни, секоја од своето време.
-Во Клара се гледам себеси. Ние сме скоро исти, само сме личности во различно време, јас од старото, а таа од новото. Баба Сузана, многу би сакала, Клара да ја развива уметничката душа во себе и да ја негува, да научи да свири на некој инструмент, да научи да ги игра нашите ора и да пее традиционални македонски песни, и сето тоа барем како хоби. А што ќе си одбере таа во животот, само таа и Господ знае. Јас, покрај нејзините родители можам да бидам само една голема поддршка за нејзиниот избор“, раскажува Сузана.
Спасовска минатата година го прослави својот 35-годишен јубилеј, со оригинален проект наречен „Приказна“. Проектот содржи цеде, како и уникатна ретро касета, УСБ коешто изгледа како клуч, хитови од Сузана Спасовска и дигитална музиучка монографија.
