Хрватскиот режисер Далибор Матаниќ (51) со години испраќал непримерни пораки и создавал непријатни ситуации за време на снимањето на филмовите, пишува хрватски „Вечерњи лист“, кој разговарал со неговите жртви, генерално, млади девојки.
Режисерот Далибор Матаниќ сега е трајно исклучен од Здружението на хрватски филмски режисери (ДХРР), одлуката е донесена на редовната седница на Собранието одржана во вторникот. Веста, која се проширила по божиќната забава на здружението, била потврдена за хрватски „24 часа“ од три независни извори, како и од самото Здружение.
Оваа драстична мерка следела по јавните обвинувања дека режисерот сексуално вознемирувал млади актерки и колешки, како и по неговото признание за несоодветно однесување, кое подоцна се обидел да го релативизира.
Покрај тоа, против Матаниќ беа поднесени четири кривични пријави.
Од тие четири пријави, три се поднесени од жртви, а една од Народната правобранителка за родова еднаквост. Токму извештајот на народната правобранителка, кој пристигнал во Канцеларијата на Општинскиот кривичен државен обвинител во Загреб во август, е најтежок. Покрај сексуалното вознемирување, Матаниќ е обвинет и за непристојни дела и консумирање дрога.
Поради овој скандал, тој ги изгуби сите работни ангажмани, меѓу кои и голема европска серија и предизборен ангажман за политичка партија.
Матаниќ им испраќал пораки со сексуална содржина на голем број жени, често оправдувајќи ги контактите со понуди за работа, по што ги убедувал да се префрлат на мобилната апликација Вибер.
Младата хрватска актерка и музичарка Тара Талер во интервју за „Вечерњи лист“ откри сè за тоа како доживеала сексуално вознемирување од Матаниќ.
