„Bread pudding“, или во буквален превод од англиски „пудинг од леб“, е популарен англиски десерт чии корени датираат уште од 11 век. Настанал како начин да се искористат остатоците од храна, особено бајатиот леб.
Штедливите готвачи го потопувале стариот и стврднат леб во мешавина од вода, шеќер и зачини за да создадат вкусен десерт. Со текот на времето во рецептот почнале да додаваат млеко и јајца, со што станал уште побогат и повкусен.
Денес ви претставуваме рецепт за пудинг од леб со боровинки и бело чоколадо – едноставен за подготовка, а со извонреден вкус.
Боровинките се одличен избор бидејќи нудат совршен баланс меѓу слаткото и киселкастото, особено во комбинација со бело чоколадо. По желба, можете да користите и друго овошје, како капини, малини или јагоди.
Најдобар резултат ќе добиете ако употребите леб стар еден до два дена, кој малку се исушил. Не користете целосно стврднат леб, бидејќи треба добро да ја впие течната смеса.
Пудинг од леб со боровинки и бело чоколадо
Состојки:
1 л слатка павлака за шлаг
450 г бајат бел леб
350 г квалитетно бело чоколадо
300 г свежи боровинки
200 г бел шеќер
3 големи јајца
2 лажички екстракт од ванила
Подготовка:
Во голем сад измешајте ги јајцата, слатката павлака, екстрактот од ванила и шеќерот. Додајте ги боровинките и ситно исечканото бело чоколадо.
Бајатиот леб исечете го на коцки со големина од околу два сантиметри и додајте го во смесата. Добро промешајте за лебот да ја впие течноста, а потоа оставете да отстои 15 минути на собна температура.
Префрлете ја смесата во огноотпорен сад, претходно намачкан со малку путер или масло, и печете во претходно загреана рерна на 180 степени околу 50 до 60 минути, односно додека десертот убаво не се испече.
Ако забележите дека површината пребрзо потемнува, покријте го садот со алуминиумска фолија.
Послужете го топол, по желба со топка сладолед од ванила.
На здравје!
