Текстописецот и новинарката Љиљана Јорговановиќ почина на 66-годишна возраст, по долга и тешка болест. Таа беше една од најзначајните авторки на текстови во регионот и блиска соработничка на покојната Марина Туцаковиќ, со која ги создаде некои од најзвучните хитови на поп и фолк сцената.
Покрај тоа што остави силен белег како текстописец, Љиљана важеше и за една од најуспешните новинарки на поранешна Југославија. Пишуваше репортажи по кои стана препознатлива, а нејзиниот стил се сметаше за автентичен и влијателен.
Од 2014 година беше дел од компанијата „Адрија медиа груп“, издавач на дневниот весник „Курир“, каде што работеше како новинарка на неделникот „Њузвик“. Во последните години од кариерата беше член на редакцијата на „Курир“, сѐ до пензионирањето во пролетта оваа година.
Љиљана Јорговановиќ е родена во 1959 година. На почетокот соработуваше со поп, рок и новобрански изведувачи, а вистински подем доживеа преку фолк сцената. Позната е по соработките со големи музички имиња како Цеца, Здравко Чолиќ, Аца Лукас, Северина, Жељко Јоксимовиќ и Џеј, меѓу многу други.
Најголем успех постигна пишувајќи песни заедно со нејзината најблиска колешка и пријателка, легендарната Марина Туцаковиќ. Нивниот авторски печат останува неизбришлив дел од музичката историја на регионот.
