Почина доајенката на македонската народна музика Атина Апостолова (78). Безживотното тело на пејачката било пронајдено во нејзиниот дом. Според некои нејзини колеги, Атина неодамна имала операција на срце, но се чувствувала добро.
Ќе остане запаметена не само по прекрасниот вокал, туку и по специфичната интерпретација на македонските народни песни кои ги изведуваше од душа, а каде и да се појавеше ширеше позитивна енергија. Често беше дел од хуманитарни концерти, некогаш иницирани токму од неа.
Атина Апостолова е родена на 20 мај во 1946 година во Скопје. Дипломирала на Економскиот факултет. Нејзини најпознати песни се Запејте мераклии, Цела вечер ќе ти пејам, Верувај ми, Усни румени, Те видов и се заљубив, Иле Илија и многу други.
