По повеќе од 40 години, режисерот Тим Бартон е подготвен да ја прекине соработката со Дизни.
Бартон, кој почна да работи во познатото студио како аниматор веднаш по завршување на студиите, изјави за „Deadline“ дека повеќе не е заинтересиран да работи со Дизни по „ужасниот голем циркус“ во кој се нашол додека го снимал римејкот на „Дамбо“ во 2019 година.
-Тоа е мојата историја, таму почнав. Бев ангажиран и отпуштен неколку пати во текот на мојата кариера таму. Работата со „Дамбо“ е тоа што мислам дека моите денови во Дизни завршија. Сфатив дека јас сум Дамбо, дека работам во тој ужасен голем циркус, и морав да побегнам. Тој филм, на одредено ниво, е прилично автобиографски, рече тој.
Познатиот режисер, исто така, го критикуваше „Дизни“ дека се оддалечи од помалите проекти во корист на своите етаблирани франшизи „Марвел“, „Пиксар“ и „Војна на ѕвездите“.
-Станаа многу хомогени, многу еднолични. Има помалку простор за различни работи, рече Бартон, кој има снимено доста филмови за „Дизни“, вклучувајќи ги „Кошмар пред Божиќ“, „Џејмс и џиновската праска“, „Алиса во земјата на чудата“, „Дамбо“ и други.
