Организаторите на наградите „Златна малина“, кои „му оддаваат почит“ на најлошиот филм на годината, ја поништија наградата што му ја доделија на Брус Вилис, откако неговото семејство потврди дека глумецот се бори со афазија, пренесува Дејли мејл.
„По долго размислување и разгледување, Златна малина донесе одлука да ја укине наградата што му беше доделена на Брус Вилис, поради неодамна објавената дијагноза. Ако нечија здравствена состојба е фактор во донесувањето одлуки и/или перформансите, признаваме дека не е соодветно да му ја дадеме наградата“, се вели во соопштението на организаторите.
Организаторите на „Златна малина“ годинава го номинираа Вилис за осум негови филмови од 2021 година во категоријата што годинава го носеше неговото име – „Најлошата изведба на Брус Вилис во филм од 2021 година“.
Cемејството на Вилис објави дека тој се повлекува од глумата поради дијагностицирана афазија. Како што се истакнува, тој се соочува со одредени здравствени проблеми кои се одразиле на неговите говорни и когнитивни способности.
