Иако на почетокот не се радувала на неговата кандидатура за украински претседател, сметајќи дека успешните кариери им се доволни, Олена Зеленска денес е најголемата поддршка за Владимир Зеленски во неговата борба за Украина.
И покрај изјавите на украинскиот претседател Зеленски дека рускиот претседател Владимир Путин го означил како „цел број 1“, правејќи го неговото семејство „цел број 2“, Олена Зеленска храбро стои покрај својот сопруг, поддржувајќи го во сите одлуки да ја спаси Украина од руската инвазија.
Откако Зеленски стана претседател во мај 2019 година, а таа стана прва дама на Украина, Олена Зеленска ја освои наклонетоста на народот, а таа самата веќе најави дека без разлика на сѐ, ќе остане со сопругот, а руската инвазија нема да ја заплаши.
Но, која е поточно Олена Зеленска, жена која е во среќен брак со украинскиот претседател од 2003 година и со него има две деца – ќерката Александра (18) и синот Цирил (9).
И двајцата се родени во Крива Риха, на југоистокот на Украина, и двајцата оделе во исто училиште, но пријателството, а потоа и љубовта се случило многу подоцна. Олена Кијашко го запознала својот иден сопруг дури на факултет, таа студирала градежништво, а тој студирал право. Случајната средба се претворила во најубавата љубовна приказна, а по осум години врска, во 2003 година, се одлучиле врската да ја крунисаат со брак.
Во раните 2000-ти, ја основале продуцентската куќа Студио Квартал-95 за продукција на филмови и телевизиски серии, како и организација на концерти.
Олена го напишала и сценариото за неговата емисија за политичка сатира наречена „Слуга на народот“, благодарение на која Зеленски стекна со таква популарност што на крајот победи на претседателските избори. Сопругата на Зеленски првично била против неговата кандидатура, а тој, свесен за тоа, извесно време ја криел од неа својата конечна одлука.
Таа сама не учествувала во претседателската кампања, но цврсто стоела со него на сите политички митинзи, покажувајќи дека ќе биде поддршка во секоја негова одлука. Но, по победата, Олена без многу размислување го зеде статусот на прва дама и се ангажираше на сите полиња, особено во Обединетите нации, како и во работа со украински претприемачи. Во август минатата година таа го свика Самитот на првите дами и господа во Киев.
„Начинот на кој се облекувате и презентирате не е само за вас, туку ја претставува и вашата земја и она што се обидувате да го постигнете. Претседателот и јас секогаш сакаме да ја претставуваме Украина на позитивен и силен начин. Тоа е одраз на нашите постапки и вредности. Тоа е и начин да се промовираат украинските дизајнери и модната индустрија и да се каже на светот повеќе за Украина, што можеме да направиме и што нудиме“, изјави таа за Diplomatic Courier.
Од почетокот на војната во Украина, Зеленска ги користи социјалните мрежи за да го охрабри својот народ во оваа најтешка борба.
„И денес нема да паничам и да плачам. Ќе бидам мирна и самоуверена. Моите деца ме гледаат. Ќе бидам покрај нив. И покрај мојот сопруг. И со тебе. Те сакам! Ја сакам Украина!“, напиша Зеленска.
