Првата дама на Украина за Си-Ен-Ен откри дека нејзината врска со сопругот, претседателот Володимир Зеленски е на „пауза“ затоа што им е забрането да се гледаат подолго време за време на војната.
Во интервјуто емитувано во вторникот, Олена Зеленска и откри на познатата новинарка Кристијана Аманпур дека не смее често да се гледа со својот сопруг, а кога ќе го види тоа е само на кратко.
„Но, барем физички го чувствувам покрај мене. Ова не е нормално. Не е нормален односот кога децата не можат да го видат својот татко и мораат да разговараат со него на телефон. Така што нашата врска е на пауза исто како и за сите Украинци. Чекаме повторно да се собереме, повторно да бидеме заедно, да поминуваме вечери заедно и да разговараме со децата за нивните работи“, изјави таа за Си-Ен-Ен.
И Зеленски и неговата сопруга одбија да ја напуштат Украина по инвазијата на Русија на 24 февруари.
Во првите два месеци од војната, семејството воопшто не можело да се види. Зеленски живеел во својата канцеларија со својот персонал, додека Олена и нивните две деца на возраст од 17 и 9 години биле чувани на тајна локација.
Во своето интервју за Си-Ен-Ен, Зеленска исто така рече дека тековната војна, која се оддалечи од Киев и се интензивираше во источниот регион на Донбас, и нанесе голема штета на земјата и дека во моментов „не може да се види крајот на нивните страдања“.
