Телевизиската водителка Николина Пишек беше гостинка во емисијата „Шоу на квадрат“, каде за првпат отворено и искрено зборуваше за многубројните убави, но и тешки моменти од својот живот. Повод за нејзиното гостување беа новите проекти на кои работи, како и успешните емисии што ги водеше на една телевизија.
Таа за многумина претставува инспирација поради својата искреност и отвореност, а особено се издвојува по силата со која успеала да ги надмине животните предизвици. Во разговорот се осврна и на чувствителната тема за вознемирување на жени и на непристојните понуди со кои многу од нив се соочуваат, но ретко зборуваат поради страв од осуда и префрлање на вината врз жртвата.
Николина Пишек откри дека за време на студиите била вознемирувана од еден професор кој ѝ упатувал несоодветни предлози. Како млада студентка по дизајн на Архитектонскиот факултет, се нашла во ситуација со која не знаела како да се справи. Таа признала дека не се осмелила да го пријави случајот, бидејќи чувствувала дека нема да добие поддршка. Воедно, била и во страв дали ќе го положи испитот.
„Не се осмелив да го пријавам тоа на никого бидејќи чувствував дека нема да имам поддршка“, рекла таа во емисијата, додавајќи: „ Бев многу исплашена дали ќе го положам испитот“.
Во емисијата раскажа и кому единствено му се доверила во тој период, зошто мислела дека нејзините родители нема да ја разберат и на кој начин на крајот успеала да се ослободи од непријатната ситуација.
Освен оваа тема, таа за првпат подетално зборуваше и за судските спорови што ги водела против одредени лица, како и за еден актуелен случај што ја привлекува вниманието на јавноста. Во дел од емисијата со прашања, спомена и една јавна личност од хрватската сцена против која поднела тужба, но подоцна се откажала од неа во текот на постапката.
Во разговорот за приватниот живот, Николина се осврна на самохраното родителство и на своите ќерки, а за првпат зборуваше и за таткото на својата постара ќерка. Интервјуто беше емотивно, при што таа не ги криеше своите чувства, а нејзината искреност и животна приказна сигурно ќе допрат до многумина.
