По подолга пауза од патување надвор од Америка, Меган Маркл и принцот Хари се подготвени за прекуокеански лет. Крајната дестинација – Холандија, а причината е добро позната.
Како што потврди портпаролот на војводата и војвотката од Сасекс, Меган Маркл ќе му се придружи на принцот Хари во Холандија во првите денови на овогодинешните „Invictus Games“, меѓународен спортски настан основан од внукот на кралицата во чест на ранетите војници и ветерани.
Овогодинешните „Invictus Games“ ќе се одржат од 16 до 22 април во Хаг, Холандија. Ова не е прва средба на Меган Маркл со овие игри. Имено, игрите Invictus, одржани во 2017 година во Торонто, беа местото на нивното прво официјално појавување во јавноста како вљубен пар. Само два месеци подоцна, парот ја објави свршувачката.
Инаку, овогодинешните игри во Холандија требаше да се одржат во 2020 година, но поради пандемијата на коронавирус беа одложени.
Интересно е тоа што Хари постојано го одложува своето враќање во Лондон, оправдувајќи се дека таму не се чувствуваат безбедно и дека им треба дополнително осигурување, додека на повикот од Холандија веднаш одговори потврдно.
