„Џонсон и Џонсон“ (Johnson & Johnson J&J) се согласи да плати 8,9 милијарди долари за да реши десетици илјади судски процеси во кои се тврди дека талкот во пудрата за бебиња и другите производи предизвикуваат рак.
J&J тврди дека производите од талк се безбедни и не предизвикуваат рак. Адвокатите на компанијата рекоа дека тврдењата за талк немаат научна основа и ги обвинија тужителите дека бараат голема финансиска добивка.
Компанијата соопшти дека нејзината подружница LTL Management LLC повторно поднела барање за заштита на доверителите за да добие судско одобрение за план за деловна реорганизација што ќе ги реши сите побарувања од парницата за пудрата на база на талк.
Тужителите тврдат дека поради употреба на талк добиле рак на репродуктивните органи и мезотелиом.
„Џонсон и Џонсон“ во 2020 година соопшти дека ќе престане да продава детска пудра од талк во САД и Канада поради, како што рече, „дезинформации“ за производот, а потоа објави дека ќе го повлече од пазарот ширум светот во 2023 година.
