Водителот Миро Кацаров се огласи лут по вулгарните навреди упатени кон неговата сопруга и седумгодишна ќерка.
Тој деновиве ужива во вистинска семејна магија во Дизниленд во Париз. Сепак, прекрасниот празничен момент и семејната идила беа нарушени од вулгарни коментари на социјалните мрежи, насочени директно кон неговото малолетно дете.
На фотографијата што ја сподели со сопругата Ивана и ќерката Миа на социјалните мрежи, тие се насмеани и се држат за раце пред препознатливиот розов замок. Со неа семејството испрати порака дека најголемата среќа често се крие во наједноставните моменти.
„Среќата е едноставна: јас, ти и нашето девојче“, стои во описот на објавата на Ивана.
Миро одамна не крие дека со голема љубов ја прифатил Миа – ќерката на Ивана од нејзиниот прв брак, која ја сака и ја чува како свое родено дете. Покрај Миа, Миро и Ивана го имаат и помалиот син Тадеј.
Но, паралелно со убавите желби, под истата објава на профилот на неговата сопруга се појавија коментари со говор на омраза. Ова предизвика итна и остра реакција од водителот, кој беше згрозен од линчот на социјалните мрежи.
„На оваквите фекалии ние им викаме народот има право коа критикува. Продолжуваме да живееме со психопати, монструми и измети… Ова се случува и на мои колеги. Јас ќе го прекинам, се колнам. За дете од 7 години се збори“, напиша револтираниот Кацаров на својот инстаграм-профил.
На другите слики што ги сподели е и малиот Тадеј, а Кацаров до нив напиша: „Спомени денес, вчера, утре. Фамилија, богатство засекогаш“.
Кацаров е, инаку, привремено поставен за директор на Универзална сала. Откако јавноста негативно реагираше на неговиот избор, Кацаров вели дека е „логично оваа функција да ја извршува некој што повеќе од 20 години е во културата и во музиката“.
„Јас сум вработен во Универзална сала од 2019 година и логично е човек одвнатре да биде в. д. директор“, вели водителот Мирослав Кацаров, кој беше назначен на оваа функција од скопскиот градоначалник Орце Ѓорѓиевски.
