Максим, синот на кошаркарката Едина Муса и поранешниот кошаркар Александар Димитровски – Мачка, го прослави својот прв роденден, а прославата започна уште во раните утрински часови со внимателно подготвено изненадување во семејниот дом.
Гордата мајка на социјалните мрежи сподели дел од атмосферата, откривајќи дека додека малиот Максим спиел, таа ја украсила неговата соба со балони и бројни играчки. На плишаните миленици им ставила роденденски капи, а пред вратата го чекал и посебен подарок – детски дрвен велосипед, украсен со балон.
„Го чекаме господинот да стане“, напиша Едина покрај фотографијата од нивното куче со розово хартиено капче на главата, додека во позадина се гледаат расфрлани балони, јасен знак дека роденденското утро започнало со насмевки.
Подоцна таа објави и фотографија од Максим, седнат на новиот велосипед, опкружен со подароци. Видливо возбудена, Муса не ја криеше радоста што нејзиниот син го одбележува првиот роденден.
Инаку, по неговото раѓање, Едина брзо се врати на тренинзите и за краток период повторно беше во препознатливата спортска форма.
Сепак, како што и самата често истакнува, приоритет ѝ е мајчинството. Максим редовно е дел од нејзините прошетки, тренинзи и дури кошаркарски натпревари, а таа со гордост потенцира дека ги наследил спортските гени од двајцата родители.
