Најстариот син на пејачката Ребека Јанковска-Ристески Маркијан наполни 19 години. Таа и нејзиниот сопруг, д-р Милан Ристески ги имаат и близнаците Макариј и Доротеј, кои се на 12-годишна возраст.
За ретката болест на Маркијан, туберна склероза Ребека во повеќе наврати отворено зборувала како и за борбата на сите родители на деца со ретки болести.
– Дека со Маркијан нешто не е во ред забележавме уште во седмиот месец од бременоста, но во прво време не бевме сигурни дека тој има туберна склероза. Видовме тумори на срцето, но не и промена на срцевата работа.
И покрај високите сомнежи, ние одлучивме Маркијан да продолжи да живее и да ги прифатиме сите предизвици и искушенија доколку навистина следат. На тримесечна возраст првпат ги забележавме симптомите – епилептични напади. Од тој момент почнаа сите детални испитувања и патувања, консултации низ многу болници – рече во една прилика во „Женски магазин“ Ребека.
Денес, Маркијан е веќе големо момче, а роденден му честиташе неговата баба, познатата ТВ-спикерка Роза Катиновска која напиша: „Среќен 19 роденден мое љубовче Маркијан. Биди ми жив и здрав, насмеан и среќен.“
