Поранешниот европратеник Антонио Панѕери и Франческо Џорџи (партнерот на Ева Каили), кои беа уапсени во петокот во контекст на случајот за корупција во кој е вмешан Европскиот парламент, ќе останат во притвор најмалку еден месец. Од затвор пак, ќе излезе Николо Фига-Таламанка, за кого е издаден режим на надзор со електронска нараквица. Ова е исходот од рочиштето што се одржа вчера во Судот во Брисел.
Досието на Ева Каили, сменета заменик-претседателка на Европскиот парламент, е одложено за 22 декември бидејќи во затворот каде што таа се наоѓа во тек е штрајк и затоа не било можно да се донесе Каили пред Судот.
Во меѓувреме, до Европскиот парламент беше претставена резолуција, подготвена од сите главни групи, за „запирање на целата работа на законодавните досиеја во врска со Катар, особено во однос на либерализацијата на визите и сите закажани посети, додека наводите нема да бидат потврдени или разрешени“. Пленарното гласање е закажано за денес.
Но според известувањата на странските медиуми, судството во Брисел ги испитува позициите на други пратеници на Европскиот парламент кои можеби примиле мито или бенефиции од странска земја за да влијаат на нивната политичка активност: накратко, во скандалот може да бидат вклучени и други луѓе покрај четворицата кои се откриени досега, а според гласините, не се однесуваат само на Катар, туку и на Мароко.
Според грчки медиуми пак, повеќе од 60 европратеници ќе бидат цел на истрагата за Катаргејт што ја спроведува белгискиот правосуден систем, а истите гласини ги објави и германскиот онлајн магазин фокус.де, но се уште немаат потврда од белгискиот сојузен обвинител.
