Ако сте љубители на чоколадни десерти, оваа есен можете да пробате нешто поинакво – неодоливо кремаст мус од костени и темна чоколада, со малку рум за дополнителна арома.
Комбинацијата од засладено пире од костени, чоколадо и слатка павлака создава богат десерт со нежна и воздушеста текстура, кој е одличен избор за есенските денови, пишува „Пун куфер“.
За подготовката ќе ви бидат потребни само десетина минути, а дополнителна предност е што нема потреба од печење. Единствено треба да почекате мусот добро да се излади во фрижидер пред послужување.
Од наведените количини се добиваат шест порции.
Состојки
- 285 мл слатка павлака за матење
- 145 мл слатка павлака за декорација
- 200 г темна чоколада
- 250 г засладено пире од костени
- 2 лажици темен рум
- Чоколадни трошки или какао во прав за украсување
Подготовка
Искршете ја темната чоколада на помали парчиња и растопете ја на пареа или во микробранова печка. Мешајте додека не добиете мазна смеса, а потоа оставете ја кратко да се подизлади, без да се стврдне.
Во подлабок сад ставете го пирето од костени и постепено додавајте ја растопената чоколада. Внимателно мешајте додека состојките целосно не се соединат.
Во добиената смеса додајте го темниот рум и повторно промешајте.
Изматете ги 285 мл слатка павлака во цврст шлаг. Со шпатула постепено додавајте го во чоколадната смеса со костени, користејќи нежни движења за мусот да ја задржи својата воздушеста текстура.
Распределете го подготвениот крем во шест чаши или помали садови за десерт.
Изматете ја преостанатата слатка павлака и ставете по малку шлаг врз секоја порција.
Оставете ги чашите во фрижидер додека мусот убаво не се излади и не добие поцврста структура.
Непосредно пред послужувањето, декорирајте со чоколадни трошки или посипете малку какао во прав.
Послужете го мусот добро изладен. Поради додадениот рум, оваа верзија на десертот е наменета за возрасни.
