На девет месеци од загубата на најблиската другарка, Ана Костадиновска сподели емотивна објава во чест на Сара Пројковска која загина во пожарот во Кочани на 16 март.
Ана и Сара таа вечер пееја придружни вокали на „ДНК“ како и многу вечери пред тоа, на многу наши познати пејачи и на многу манифестации. Сара Пројковска загина во пожарот како и повеќето членови на „ДНК“, а Ана успеа да се спаси.
За својата другарка и колешка, Ана само кусо напиша „9“, мислејќи на деветте месеци поминати без неа со емотикон срце и три фотографии кои сведочат за нивните убави заеднички моменти. Ана Костадиновска, која е ќерка на познатиот композитор Кире Костов, неодамна даде емотивно интервју за „Слободен печат“.
-Сара беше прекрасна личност, жена-светлина. Секој миг поминат со неа ми ја грее душата. Тука е и секогаш ќе биде, сѐ додека дишам и постојам. Пеењето секогаш ми било единствен лек за секоја душевна болка- рече Ана, која е професорка по пеење во ДМБУЦ „Илија Николовски-Луј“.
Во февруари во 2022 година почина нејзиниот сопруг Бобан, по само неколку месеци тешко боледување. Нешто повеќе од една година потоа, во јули во 2023 година таа го загуби татка си, легендарниот композитор Кире Костов, кој почина на 75 години, а на 16 март годинава си замина нејзиното како што вели второ семејство, „ДНК“.
Владимир Блажев-Панчо, кој таа го нарекуваше „братче“, почина на 14 октомври, по седуммесечно лекување во болница.
