Вишиот суд во Белград донесе правосилна пресуда со која режисерот и актер Драган Бјелогрлиќ е осуден на условна казна затвор од шест месеци доколку во следните две години изврши кривично дело, поради насилничко однесување кон неговиот колега Предраг Антонијевиќ на 23 август 2021 година во нишкиот хотел „Амбасадор“. Ова го потврдија за РТС од судот.
Судот ги одби како неосновани сите жалби и ја потврди првостепената пресуда на Првиот основен суд во Белград.
Оштетениот Антонијевиќ е упатен да го остварува имотно-правното побарување преку парнична постапка.
Истрагата првично беше спроведена во Ниш, но по поднесувањето на обвинителниот предлог, Основниот суд во Ниш побара предметот да биде префрлен во Белград. Врховниот касационен суд го одобри барањето поради процесна целисходност, бидејќи обвинетиот, оштетениот, бранителот и сведоците се од Белград.
Основното јавно обвинителство во Ниш на 26 ноември 2021 година поднесе обвинителен предлог против Бјелогрлиќ, затоа што во раните утрински часови на 23 август 2021 година повеќепати го удрил по главата режисерот Предраг Антонијевиќ во хотелот „Амбасадор“.
Бјелогрлиќ беше обвинет за кривично дело насилничко однесување. На сослушувањето во обвинителството тој го признал делото и изразил жалење. Двајцата режисери тогаш престојувале во Ниш по повод манифестацијата „56. Филмски сусрети“.
